कारागारमा एआई एक्सरेबाट क्षयरोगका बिरामी खोजिँदै

काठमाण्डौ — कृत्रिम बुद्धिमत्ता (एआई) एक्सरे उपकरणमार्फत जिल्ला कारागार बाँके नेपालगञ्जमा रहेका कैदीबन्दी, सुरक्षाकर्मी तथा कर्मचारीको क्षयरोग पहिचान शुरु गरिएको छ । यो विधिबाट क्षयरोगको खोजपड्ताल गर्न शिविर आयोजना गरिएको स्वास्थ्य कार्यालय बाँकेका क्षयरोग सम्पर्क व्यक्ति रवीन्द्रकुमार शाहले जानकारी दिनुभयो ।

उहाँका अनुसार कृत्रिम बुद्धिमत्ताको सहायताले छातीको एक्सरे विश्लेषण गरेर क्षयरोगको सम्भावित सङ्क्रमण पत्ता लगाउने गरिएको छ । यो आधुनिक प्रविधि हो ।  यसमा बिरामीको छातीको एक्सरे तस्बिर कम्प्युटर सफ्टवेयरमा राखिन्छ र एआई प्रणालीले फोक्सोमा देखिने असामान्य दाग, सङ्क्रमण वा क्षयरोगसँग मिल्ने सङ्केत विश्लेषण गर्ने शाहले बताउनुभयो ।

लुम्बिनी प्रदेश स्वास्थ्य निर्देशनालयका निर्देशक डा रोशनलाल चौधरीले प्रदेश सरकारले क्षयरोग मुक्त अभियानका लागि रोगीको पहिचान गर्ने र उपचारको पहुँचमा ल्याउने गरी विभिन्न कार्यक्रम गर्दै आएको बताउनुभयो । बाँकेमा चालु आर्थिक वर्षको नौ महिनामा ७ सय २९ जना क्षयरोगका बिरामी फेला परेका छन् ।