न्युज रेडियो टाइम्स
- 10-Baishakh-2083 1:37:33
काठमाण्डाै – पाकिस्तानका क्रिकेटर मोहम्मद नवाजमाथि आईसीसी टी–२० विश्वकप क्रिकेटको समयमा लागूऔषध प्रयोग गरेको आरोप लागेको छ ।
गएको मार्चमा सम्पन्न टी–२० विश्वकपका क्रममा गरेको परीक्षणमा ३२ वर्षीय क्रिकेटरको नतिजा पोजेटिभ आएपछि अन्तर्राष्ट्रिय क्रिकेट परिषद् (आईसीसी) ले पाकिस्तान क्रिकेट बोर्ड (पीसीबी) लाई यसबारे जानकारी गराएको हो ।
‘रिक्रिएशनल ड्रग’ (मनोरञ्जनका लागि नशालु पदार्थको प्रयोग) का सम्बन्धमा नवाजमाथि कानूनी प्रक्रिया शुरू भइसकेको पीसीबीका प्रवक्ता आमिर मिरले बताएका छन् । पीसीबीले आफ्नो अनुसन्धान प्रतिवेदन आजै आईसीसीलाई बुझाउने तयारी गरेको छ ।
नवाजले टी–२० विश्वकपमा पाकिस्तानका लागि सबै ७ खेल खेल्दै ७ विकेट लिनुका साथै १५ रन बनाएका थिए । प्रतियोगितामा पाकिस्तान ‘सुपर–एट’ चरणबाट बाहिरिएको थियो ।
यो विवादपछि मोहम्मद नवाजले इङ्ग्ल्यान्डमा हुने टी–२० ब्लास्ट लिग खेल्ने अवसर गुमाएका छन् । उनलाई इङ्ग्लिस काउन्टी क्लब ‘सर्रे’ ले यस सिजनका लागि सम्झौता गरेका थिए ।
नवाजले अहिले ‘पाकिस्तान सुपर लिग’ (पीएसएल) मा मुल्तान सुल्तान्सबाट खेलिरहेका छन् ।
© न्युज रेडियो टाइम्स
