महिला टी–२० विश्वकप २०२६ का लागि कीर्तिमानी पुरस्कार रकम घोषणा

काठमाण्डाै – आईसीसी महिला टी–२० विश्वकप २०२६ का लागि कीर्तिमानी पुरस्कार रकम घोषणा भएको छ । आउँदो जुन र जुलाईमा इङ्ग्ल्यान्ड र वेल्समा आयोजना हुने १०औँ संस्करणको प्रतियोगिताका लागि अन्तर्राष्ट्रिय क्रिकेट परिषद् (आईसीसी) ले कीर्तिमानी पुरस्कार रकम घोषणा गरेको हो ।

महिला टी–२० विश्वकप २०२६ को समग्र पुरस्कार रकम बढेर ८७ लाख ६४ हजार ६१५ अमेरिकी डलर पुगेको छ । अघिल्लो संस्करणको तुलनामा अहिले पुरस्कार रकम १० प्रतिशतले बढेको हो ।

सन् २०२४ मा समग्र पुरस्कार रकम ७९ लाख ५८ हजार ७७ डलर थियो । यस पटक इतिहासमा पहिलो पटक १२ वटा टोली सहभागी हुँदैछन् ।

यस पटक विजेता टोलीले २३ लाख ४० हजार डलर र उपविजेता टोलीले ११ लाख ७० हजार डलर पुरस्कार प्राप्त गर्नेछन् । यस्तै सेमिफाइनलमा पराजित हुने टोलीले ६ लाख ७५ हजार, समूह चरणमा जित्ने टोलीले हरेक पटक ३१ हजार १५४ डलर प्राप्त गर्नेछन् ।

सहभागी सबै १२ टोलीले न्यूनतम २ लाख ४७ हजार ५०० डलर पुरस्कार प्राप्त गर्ने सुनिश्चित भएको छ ।