चुनावी प्रक्रियामा महिला सहभागीतालाई प्राथामिकतामा : निर्वाचन आयोग

काठमाण्डौ – निर्वाचन आयोगले लैङ्गिक समावेशिता सम्बन्धी नीति कार्यान्वयन गर्दै चुनावी प्रक्रियाका हरेक चरणमा महिला सहभागितालाई प्राथमिकतामा राखेको जनाएको छ । न्युज एजेन्सी नेपालसँग कुराकानी गर्दै आयोगका आयुक्त डाक्टर जानकीकुमारी तुलाधरले संविधान र कानूनले निर्देश गरे बमोजिम आयोग लैङ्गिक समावेशी निर्वाचन गराउन सदैव प्रतिवद्ध रहेको बताउनुभएको हो ।

आयुक्त तुलाधरले निर्वाचन आयोगले हरेक राजनीतिक दललाई निर्वाचन सम्पर्क व्यक्तिको रूपमा महिलालाई नै पठाउन अनुरोध गरेको पनि बताउनुभयो । उहाँले मतदान केन्द्रहरुलाई महिला तथा अपाङ्गता मैत्री बनाउनेमा आयोग सचेत रहेको बताउनुभयो ।

फागुन २१ को प्रतिनिधि सभा सदस्य चुनावका लागि तीन जना मुख्य निर्वाचनअधिकृत र १८ जना निर्वाचन अधिकृत गरी २१ जना महिला निर्वाचन अधिकृत खटिएका छन् । आयुक्त तुलाधरले फागुन २१ गते हुने चुनावलाई सफल बनाउन सबै सरोकारवालाहरूको भूमिका महत्त्वपूर्ण रहेको बताउनुभयो ।

देश चुनावमय भइसकेको उल्लेख गर्दै उहाँले चुनाव लागि सकारात्मक वातावरण निर्माण गर्न आयोग मात्र नभई सबै पक्षको सहयोग उत्तिकै आवश्यक रहेको बताउनुभएको हो ।

यसैबीच निर्वाचन आयोगले जाँडरक्सीको बिक्रीवितरण र प्रयोगमा रोक लगाउने निर्णय कायान्वयनमा कडाइ गरेको छ । चुनावलाई शान्तिपूर्ण, निष्पक्ष र भयरहित वातावरणमा सम्पन्न गर्न हिजोदेखि देशभर जाँडरक्सीमाथी प्रतिबन्ध लगाएको आयोगले त्यसको अनुगमनलाई पनि जोड दिएको हो ।

निर्वाचन आयोगका सूचना अधिकारी सुमन घिमिरेले तोकिएको अवधिमा जाँडरक्सी विक्री–वितरण वा प्रयोग गरेको पाइए प्रचलित कानूनअनुसार कारबाही गरिने उहाँले जानकारी दिनुभयो ।