न्युज रेडियो टाइम्स
- 02-Jestha-2082 10:25:45
जेठ १, भारतको लखनउमा गुडिरहेको बसमा आगलागी भएको छ । आज बिहान भएको दुर्घटनामा दुई जना बालबालिकासहित पाँच जनाको जलेर ज्यान गएको टाइम्स अफ इन्डियाले जनाएको छ ।
८० जना यात्रु लिएर बिहारबाट दिल्ली जाँदै गरेको बसमा आगलागी भएको हो । बिहानैको समयमा बसमा रहेका धेरै जना सुतिरहेको अवस्थामा बस किसान पथ पुग्दा आगलागी भएको थियो ।
बसमा धूवाँ भरिन थालेपछि यात्रुहरूको भागदौड मच्चिएको थियो । बाहिर निस्कन नसकेर बसभित्रै फसेका यात्रुको ज्यान गएको हो । दमकलले झन्डै ३० मिनेट लगाएर आगो निभाएको खबरमा उल्लेख छ ।
प्रहरीको प्रारम्भिक अनुसन्धानमा बसको आपत्कालीन गेट नखुलेको देखिएको छ । बसमा पाँच–पाँच किलोका सात वटा ग्यास सिलिन्डर भए पनि कुनै पनि सिलिन्डर विस्फोट भएका थिएनन् ।
© न्युज रेडियो टाइम्स
